Imom Buxoriy xalqaro ilmiy-tadqiqot markazi bukhari.uz
Рамазон – бу шунчаки емоқ-ичмоқдан тийилиш ойи эмас.
Бу – нафсни тарбия қилиш, қалбни поклаш ва ҳаётимизни ҳалоллик асосида қайта қуришни бошлаш ойидир.
Рўза бизга сабрни ўргатади.
Аммо Рамазоннинг энг катта дарсларидан бири — ҳалолликдир.
Ҳалоллик фақат ҳалол таом ейиш билангина чекланмайди.
Ҳалоллик – ишга виждонан ёндашиш.
Ҳалоллик – бировнинг ҳаққини емаслик.
Ҳалоллик – гапда ростгўй, амалда покиза бўлишдир.
Рўзадор инсон ёлғиз қолганида ҳам сув ичмайди. Нега?
Чунки Аллоҳ кўриб турганини билади.
Ана шу туйғу — ҳақиқий ҳалолликнинг илдизидир.
Инсон одамлар учун эмас, виждони ва Рабби учун тўғри яшай олиши керак.
Бугун ўзимиздан сўрайлик:
Еб-ичаётганим ва едириб-ичираётганим ҳалолми?
Савдода бировни алдамаяпманми?
Бўйнимда бирор кимнинг ҳаққи қолиб кетмадими?
Кимдандир кечирим сўрашим керак эмасми?
Рамазон – бу эврилиш даражасидаги ўзгариш ойидир.
Агар шу ойда қалбимизни поклаб, ҳалолликни ҳаёт мезонига айлантира олсак, нафақат рўзамиз, балки бутун умримиз баракали бўлади.
Келинг, бу муборак ойда очлик ва ташналик билан бирга қалб парҳезини ҳам тутайлик.
Фақат бир ой эмас — бутун умр ҳалол яшашга аҳд қилайлик.
Рамазон биз учун сабр мактабигина эмас,
балки поклик ва ҳалоллик мадрасаси бўлсин.
Аллоҳ барчамизни ҳалол ризқли, пок ниятли ва ростгўй бандаларидан қилсин.
Абдулҳай ХУШВАҚТОВ,
Имом Бухорий халқаро илмий-тадқиқот маркази илмий ходими
