Imom Buxoriy xalqaro ilmiy-tadqiqot markazi bukhari.uz
Мамлакатимизда меҳмон бўлиб турган АҚШнинг Глобал ҳамкорлик институти фахрий президенти К.Сайл бошчилигидаги делегация 18 сентябрь куни Самарқандга ташриф буюрди.
Ташриф дастурига мувофиқ, делегациянинг бир гуруҳ аъзолари 2018 йил 18-сентябр куни Самарқанд шаҳрига қилинган ташрифи давомида Самарқанд вилояти ҳокимининг жамоат ва диний ташкилотлар билан ишлаш бўйича ўринбосари Ш.Қулматов ҳамроҳлигида Имом Бухорий мажмуасига ҳам ташриф буюрдилар. Меҳмонлар ташриф чоғида мажмуа билан танишиб, Имом Бухорий қабрини зиёрат қилишди.
Шундан сўнг, делегация аъзолари Имом Бухорий халқаро илмий-тадқиқот марказининг янги биносига ташриф буюриб, амалга оширилган бунёдкорлик ишлари билан яқиндан танишишди. Меҳмонларга Марказ илмий котиби Б. Турсунов ва Нашрлар бўлими бошлиғи О. Муҳаммадиев ҳамроҳлик қилиб, Марказнинг ташкил топиши, мақсад ва вазифалари ҳамда истиқболли режалари ҳақида сўзлаб бердилар.
Шунингдек, меҳмонлар Ҳадис илмий мактабига ҳам ташриф қилиб, мактаб биносида яратилган қулай шарт-шароитлар билан танишдилар ҳамда амалга оширилган ишларни юқори баҳоладилар.
Шу билан делегациянинг Имом Бухорий мажмуасига ташрифи ўз якунига етди.
