“Маърифат карвони” йўлга чиқди

Хабар берилганидек, жорий йилнинг 2-15 декабрь кунлари Ўзбекистондаги Ислом цивилизацияси маркази, Республика Маънавият ва маърифат маркази, Ўзбекистон маҳаллалари уюшмаси ҳамда қатор ташкилотлар билан ҳамкорликда “Тамаддун, маданият ва маърифат” мавзусида юртимиз бўйлаб “Маърифат карвони” илмий-маърифий ва маданий тарғибот тадбирлари ўтказилмоқда.

“Маърифат карвони”да ҳудудлардаги олимлар, зиёлилар, санъат ва маданият намоёндалари, маънавий-маърифий ишларга масъуллар, маҳалла фаоллари ҳамда илғор ёшларнинг бу борадаги билим ва кўникмаларини ошириш, мамлакатимизнинг миллий-мафкура йўналишидаги ислоҳотлари, жамиятни, айниқса, ёшларни бузғунчи ғоялардан ҳимоя қилишда зиёлиларни фаолликка ундаш, улар учун мулоқот платформасини яратишдан иборат. Айнан зиёлиларни мазкур ишга кенг жалб қилиш орқали, халқимиз орасида ўзликни англаш ва тарихий илдизимизга оид билимларни ошириш мақсад қилинган.

Лойиҳа доирасида вилоятлар ва Қорақалпоғистон Республикасида 3 декабрьдан бошлаб ўтказилаётган тадбирларда кўплаб илмий муассасалар вакиллари билан бирга Имом Бухорий халқаро илмий-тадқиқот маркази ходимлари ҳам фаол қатнашиб, ўз маърузаларида миллий ва исломий қадриятлар, маърифат ва таълимнинг аҳамияти, Имом Бухорий ва бошқа буюк алломаларнинг илмий мероси ҳақида сўз юритмоқда.

Сурхондарё вилояти Имом Термизий халқаро илмий-тадқиқот марказида «Янги Ўзбекистонда диний-маърифий соҳада амалга оширилаётган ислоҳотлар ва бунёдкорлик ишлари» мавзусида ўтказилган зиёлилар форумида юртимизда олиб борилаётган ислоҳотлар, диний соҳага бўлган эътибор, эришилган ютуқлар ҳақида сўз борди.

Тарғибот тадбирлари Термиз иқтисодиёт ва сервис институтида “Янги Ўзбекистон – ислоҳотлар фалсафаси” номли маънавий-маърифий анжуман ҳамда Термиз Давлат муҳандислик ва агротехнологиялар унверситетида “Замонавий ёшлар – тараққиёт драйвери” мавзусидаги илм-фан ва инновацияларга бағишланган маҳорат дарслари ва китоб тақдимоти билан давом этди.

Худди шундай тадбирлар республикамизнинг Жиззах, Наманган вилоятлари ва Қорақалпоғистон Республикасида ўтказилди.

Бугун “Маърифат карвони” тадбирлари Сирдарё, Хоразм, Фарғона вилоятларида давом этади.