Лойиҳалар маъқулланди

Хабар берилганидек, шу кунларда Тошкент шаҳрида “Шарқ ренессанси феномени: салтанатлар, динлар, шахслар ва тамаддунлар” мавзусида маданий мерос ҳафталиги ўтказилмоқда.

Ҳафталик тадбирларида Имом Бухорий халқаро илмий-тадқиқот маркази илмий ходимлари фаол иштирок этиб, Имом Бухорий инновацион музей экспозициясини бойитишга йўналтирилган 5 та лойиҳа тақдимотини ўтказди.

Имом Бухорийнинг бизгача етиб келган 12 асари муляжини тайёрлаш, уларнинг дунё фондларида сақланаётган қўлёзма нусхалари реестрини яратиш, “Имом Бухорий мажмуаси: ўтмиш ва бугун” китоб-альбомини нашрдан чиқариш, улуғ муҳаддис китобларининг Туркия кутубхона фондларида сақланаётган қўлёзма нусхалари каталоги, шунингдек, Мовароуннаҳр муҳаддислари асарларининг қўлёзмалари каталогини тузиш каби йўналишларда тақдим қилинган лойиҳалар илмий жамоатчилик вакиллари томонидан тўла маъқулланди.

Хорижий ва маҳаллий олимлар мазкур тақдимотларнинг долзарб аҳамиятига урғу қаратиб, ҳар бири тадқиқотлар йўналишида узоқ йилларга мўлжалланган йўл харитасини белгилаб берадиган илмий-амалий қийматга эга эканини таъкидлади.

Ҳафталик тадбирлари давом этмоқда.