Истиқболли лойиҳалар муҳокамаси

Имом Бухорий халқаро илмий-тадқиқот марказида Биринчи Ренессанс даври ва Янги Ўзбекистонда диний-маърифий йўналишда амалга оширилаётган ислоҳотларга оид илмий ва инновацион лойиҳалар муҳокамаси бўлиб ўтди.

Унда лойиҳаларни амалга ошириш юзасидан Марказ илмий ходимларидан тузилган махсус ишчи гуруҳ аъзолари, лойиҳаларнинг раҳбарлари ва ижрочилари иштирок этди.

Муҳокама жараёнида лойиҳаларда Биринчи Ренессанс давридаги илм-фан тараққиёти, унинг Мовароуннаҳр ҳудудидаги илмий анъаналарга таъсири даражаси холисона, имкон қадар тўлиқ, қандай бўлса борича кўрсатилиши лозимлиги таъкидланди. Шунингдек, Янги Ўзбекистонда диний-маърифий соҳада амалга оширилаётган ислоҳотларнинг аҳамияти ва самарасини намоён этишда инновацион ёндашувлар борасида ҳам қизғин фикр алмашилди.

Таъкидланганидек, амалга оширилаётган илмий лойиҳалар нафақат миллий, балки халқаро миқёсда ҳам муҳим аҳамият касб этиб, Имом Бухорий инновацион музейи контентини ҳам бойитади. Шу муносабат билан лойиҳаларни самарали тарзда рўёбга чиқариш, янги тадқиқотлар учун замонавий услублардан фойдаланиш, халқаро академик доиралар ва маҳаллий илмий жамоатчилик билан ҳамкорликни мустаҳкамлаш бўйича қатор жўяли таклифлар илгари сурилди. Бу борада Туркиянинг соҳада анча тажриба орттирган “Outdoor Factory” компанияси билан жадал иш олиб бориш зарурлиги қайд этилди.

Ушбу компания 2010 йилда Истанбулда ташкил этилган йирик қурилиш ва лойиҳалаштириш корхонаси бўлиб, асосий фаолияти боғлар, музейлар ва маданий объектларни лойиҳалаштириш ва бунёд этишдан иборат. Бугунги кунда Туркия, Қатар, Италия, АҚШ, Германия ва Ўзбекистонда ўз ваколатхоналарига эга бўлган “Outdoor Factory” дунё бўйлаб 350 дан ортиқ концептуал лойиҳа, шу жумладан, 25 музей ва 110 монументнинг лойиҳаларини ишлаб чиққан ва амалга оширган.

Муҳокама якунида яқин истиқболда амалга ошириладиган илмий ва инновацион лойиҳаларни амалий жиҳатдан янада такомиллаштириш, уларга малакали тадқиқотчиларни жалб қилиш бўйича аниқ вазифалар белгилаб олинди. Шунингдек, лойиҳалар тадқиқотларининг натижадорлигини таъминлаш ва илмий ишланмаларни амалиётга жорий этишнинг ташкилий-ҳуқуқий, молиявий ва амалий жиҳатлари муҳокама қилиниб, тегишли чора-тадбирлар режаси ишлаб чиқилди.

Имом Бухорий халқаро илмий-тадқиқот маркази
Матбуот хизмати