Imom Buxoriy xalqaro ilmiy-tadqiqot markazi bukhari.uz
Абу Муҳсин Муҳаммад Боқир ибн Муҳаммад Али қаламига мансуб «Мақомоти Хожа Баҳоуддин Нақшбанд» китобида Баҳоуддин Нақшбанднинг биринчи халифаси Алоуддин Атторнинг қуйидаги гапи келтирилади:
«Ҳазратнинг қадамлари суннатга тобе бўлишда мустаҳкам эди. Ҳалолга интилиш ва шубҳали нарсалардан қочишни, айниқса, ҳалол луқмани таъкидлаб гапирарди. Суҳбатида доимо қуйидаги ҳикмат айтилар эди:
«Ибодат – ўн қисм, тўққиз қисми ҳалолни қидириш, бир қисми бошқа ибодатлардир».
Бу ҳикмат бизга шуни англатадики, ибодат фақат намоз, рўза ёки зикр билангина чекланмайди. Ибодатнинг энг катта қисми — ҳалол ризқни излашдир.
Маънавий камолот пок ва ҳалол турмушдан бошланади. Ҳалол луқма қалбни поклайди, дуоларни ижобатга яқинлаштиради, фарзандлар тарбиясига барака олиб киради.
Демак, ҳақиқий ибодат — ҳалол меҳнат, пок ризқ ва комилликка интилишдир.
Аллоҳ таоло ризқимизни ҳалол ва баракали қилсин.
Баҳодир Мирзаев
Имом Бухорий халқаро илмий-тадқиқот маркази илмий ходими
