Imom Buxoriy xalqaro ilmiy-tadqiqot markazi bukhari.uz
Imom Buxoriy xalqaro ilmiy-tadqiqot markazida indoneziyalik bir guruh kinoijodkorlar tomonidan “Hijrat orzusi” nomli badiiy filmning tegishli qismlari suratga olinmoqda.
Indoneziyaning “Sinemata Buana Kresindo” (SBK) kinostudiyasi tomonidan yaratilayotgan diniy drama mamlakatlarimiz xalqlari oʻrtasidagi tarixiy va madaniy bogʻliqlik va mushtarak jihatlarni oʻzida aks ettiradi.
Filmning asosiy qismlari Samarqand, Buxoro va Toshkent kabi tarixiy shaharlarda suratga olinadi. Samarqanddagi Imom Buxoriy majmuasi markaziy manzil sifatida tanlangan filmda Muhaddislar imomi, hadis borasida Moʻminlarning amiri Imom Buxoriy hayoti va ilmiy merosidan ilhomlangan maʼnaviy mazmun ifodalanadi.
Kinoasar ikki xalq vakillari oʻrtasidagi, keyinchalik islomiy qadriyatlar bilan uygʻunlashgan muhabbat tarixi orqali hijrat va maʼnaviy yuksalish mavzularini koʻtarib chiqadi. Film syujetining asosini Oʻzbekiston va Indoneziya xalqlari madaniyati oʻrtasidagi oʻxshashliklar va farqli jihatlar tashkil etadi.
Film ijrochi prodyuseri Budi Yuliantoning fikricha, “Oʻzbekistonning madaniy va tarixiy boyligi, ayniqsa, Samarqand, Buxoro va Toshkentning qadimiy qadamjolari filmni vizual jihatdan yanada boyitishga xizmat qiladi”.
Suratga olish ishlarining 30 foizi Oʻzbekistonda boʻlib oʻtadi, qolgan qismi esa Indoneziyaning Bogor va Belitung shaharlarida amalga oshiriladi.
Indoneziyaning mashhur aktyorlari Steffi Zamora, Endi Arfian va Daffa Vardxana qatnashayotgan kinokartinada oʻzbek kino saʼnatining iqtidorli namoyandalaridan biri Adolat Kimsanova, shuningdek, Temur Mirzayev va Azizbek Abdullayev kabi debyutantlar ham ishtirok etadi. Tajribali rejissyor Jastis Ariimba tomonidan suratga olinayotgan film ijodkorlari ushbu loyiha nafaqat Oʻzbekiston va Indoneziya, balki butun Osiyoda katta qiziqish uygʻotishiga ishonch bildirmoqda.
Syujet va konstruksiyasi jihatidan noyob boʻladigan bu kinoasarni kelasi yil Indoneziyaning Markaziy telekanallari orqali namoyish etish rejalashtirilgan.
