Imom Buxoriy xalqaro ilmiy-tadqiqot markazi bukhari.uz
Bugun Imom Buxoriy xalqaro ilmiy-tadqiqot markaziga ayni kunlarda mamlakatimizda boʻlib turgan Saudiya Arabistoni Podshohligi haj va umra ishlari vaziri Tavfiq bin Favzon ar-Rabia boshchiligidagi delegatsiya tashrif buyurdi.
Yuqori martabali mehmonlarni Markaz direktori oʻrinbosari Otabek Muhammadiyev va ziyorat turizmini rivojlantirish ilmiy boʻlimi mudiri Barot Amonov kutib oldi.
Delegatsiya aʼzolari Markaz va undagi Imom Buxoriy muzeyi faoliyati bilan yaqindan tanishdi. Ularga Markazda olib borilayotgan ilmiy tadqiqotlar va erishilgan natijalar xususida qisqacha maʼlumot berildi.
Mehmonlar Imom Buxoriy siyratiga boʻlgan cheksiz ehtiromini bildirib, ilmiy jamoaning allomalar boy maʼnaviy merosini izchil oʻrganish ishiga muvaffaqiyat tiladi.
Tashrif mobaynida delegatsiyaga Prezidentning jamoat va diniy tashkilotlar bilan hamkorlik masalalari boʻyicha maslahatchisi Muzaffar Komilov, Oʻzbekiston Respublikasining Saudiya Arabistonidagi favqulodda va muxtor elchisi Ulugʻbek Maqsudov, Oʻzbekiston musulmonlari idorasi raisining birinchi oʻrinbosari Homidjon Ishmatbekov va boshqa mutasaddilar hamrohlik qildi.
