Imom Buxoriy xalqaro ilmiy-tadqiqot markazi bukhari.uz
Imom Buxoriy nomidagi xalqaro stipendiya dasturi doirasida navbatdagi xorijlik tadqiqotchi — Misr arab qoʻlyozmalari instituti magistranti Noha Odil ilmiy amaliyot oʻtash uchun Markazga keldi.
Misrlik tadqiqotchi Markaz direktori Shovosil Ziyodov qabulida boʻlib, Oʻzbekistondagi islomiy sanʼat, tarixiy ustalar uyushmalari (hunarmandchilik gildiyalari) va boy qoʻlyozma anʼanalarini tadqiq etishga qaratilgan ilmiy rejalari va izlanishlarining asosiy maqsadlari bilan oʻrtoqlashdi.
Muloqot davomida Markaz rahbariyati tomonidan tadqiqotchiga muassasada yaratilgan shart-sharoitlar, boy kutubxona va qoʻlyozmalar fondi imkoniyatlari haqida atroflicha maʼlumot berildi.
Belgilangan amaliyot dasturiga muvofiq, Noha Odil Markaz fondidagi nodir manbalar bilan ishlash, yurtimizdagi turdosh ilmiy-tadqiqot muassasalari va muzeylar faoliyati bilan tanishish barobarida, mahalliy qoʻlyozmashunos olimlar va soha mutaxassislari bilan ilmiy muloqotlar oʻtkazishni rejalashtirgan.
Matbuot xizmati
