Imom Buxoriy xalqaro ilmiy-tadqiqot markazi bukhari.uz
Imom Buxoriy xalqaro ilmiy-tadqiqot markazida Birinchi Renessans davri va Yangi Oʻzbekistonda diniy-maʼrifiy yoʻnalishda amalga oshirilayotgan islohotlarga oid ilmiy va innovatsion loyihalar muhokamasi boʻlib oʻtdi.
Unda loyihalarni amalga oshirish yuzasidan Markaz ilmiy xodimlaridan tuzilgan maxsus ishchi guruh aʼzolari, loyihalarning rahbarlari va ijrochilari ishtirok etdi.
Muhokama jarayonida loyihalarda Birinchi Renessans davridagi ilm-fan taraqqiyoti, uning Movarounnahr hududidagi ilmiy anʼanalarga taʼsiri darajasi xolisona, imkon qadar toʻliq, qanday boʻlsa boricha koʻrsatilishi lozimligi taʼkidlandi. Shuningdek, Yangi Oʻzbekistonda diniy-maʼrifiy sohada amalga oshirilayotgan islohotlarning ahamiyati va samarasini namoyon etishda innovatsion yondashuvlar borasida ham qizgʻin fikr almashildi.
Taʼkidlanganidek, amalga oshirilayotgan ilmiy loyihalar nafaqat milliy, balki xalqaro miqyosda ham muhim ahamiyat kasb etib, Imom Buxoriy innovatsion muzeyi kontentini ham boyitadi. Shu munosabat bilan loyihalarni samarali tarzda roʻyobga chiqarish, yangi tadqiqotlar uchun zamonaviy uslublardan foydalanish, xalqaro akademik doiralar va mahalliy ilmiy jamoatchilik bilan hamkorlikni mustahkamlash boʻyicha qator joʻyali takliflar ilgari surildi. Bu borada Turkiyaning sohada ancha tajriba orttirgan “Outdoor Factory” kompaniyasi bilan jadal ish olib borish zarurligi qayd etildi.
Ushbu kompaniya 2010-yilda Istanbulda tashkil etilgan yirik qurilish va loyihalashtirish korxonasi boʻlib, asosiy faoliyati bogʻlar, muzeylar va madaniy obyektlarni loyihalashtirish va bunyod etishdan iborat. Bugungi kunda Turkiya, Qatar, Italiya, AQSH, Germaniya va Oʻzbekistonda oʻz vakolatxonalariga ega boʻlgan “Outdoor Factory” dunyo boʻylab 350 dan ortiq konseptual loyiha, shu jumladan, 25 muzey va 110 monumentning loyihalarini ishlab chiqqan va amalga oshirgan.
Muhokama yakunida yaqin istiqbolda amalga oshiriladigan ilmiy va innovatsion loyihalarni amaliy jihatdan yanada takomillashtirish, ularga malakali tadqiqotchilarni jalb qilish boʻyicha aniq vazifalar belgilab olindi. Shuningdek, loyihalar tadqiqotlarining natijadorligini taʼminlash va ilmiy ishlanmalarni amaliyotga joriy etishning tashkiliy-huquqiy, moliyaviy va amaliy jihatlari muhokama qilinib, tegishli chora-tadbirlar rejasi ishlab chiqildi.
Imom Buxoriy xalqaro ilmiy-tadqiqot markazi
Matbuot xizmati
