“Maʼrifat karvoni” Samarqandda

Xabar berilganidek, joriy yilning 2–13-dekabr kunlari   Oʻzbekistondagi Islom sivilizatsiyasi markazi, Respublika Maʼnaviyat va maʼrifat markazi, Oʻzbekiston mahallalari uyushmasi hamda qator tashkilotlar bilan hamkorlikda “Tamaddun, madaniyat va maʼrifat” mavzusida yurtimiz boʻylab “Maʼrifat karvoni” ilmiy-maʼrifiy va madaniy targʻibot tadbirlari oʻtkazilmoqda. Mazkur targʻibot tadbirlari bugun Samarqandda ham start oldi.

Samarqand shahridagi Yoshlar markazida “Yangi Oʻzbekistonda maʼnaviy, diniy-maʼrifiy sohada amalga oshirilayotgan islohotlar va bunyodkorlik ishlari” mavzusida ziyolilar forumi bilan boshlangan tadbirda viloyat hokimligi masʼullari, respublika Maʼnaviyat va maʼrifat markazi rahbari Otabek Hasanov, Oʻzbekistondagi Islom sivilizatsiyasi markazi direktori Firdavs Abduxoliqov, ISTF-xalqaro moliyaviy texnologiyalar instituti rektori maslahatchisi, siyosiy fanlar doktori, professor Narzulla Joʻrayev, viloyatdagi ziyolilar, imom-xatiblar, otinoyilar hamda mahalla oqsoqollari ishtirok etdi.   

“Maʼrifat karvoni”da hududlardagi olimlar, ziyolilar, sanʼat va madaniyat namoyandalari, maʼnaviy-maʼrifiy ishlarga masʼullar, mahalla faollari hamda ilgʻor yoshlarning bu boradagi bilim va koʻnikmalarini oshirish, mamlakatimizning milliy-mafkura yoʻnalishidagi islohotlari, jamiyatni, ayniqsa, yoshlarni buzgʻunchi gʻoyalardan himoya qilishda ziyolilarni faollikka undash, ular uchun muloqot platformasini yaratishdan iborat. Aynan ziyolilarni mazkur ishga keng jalb qilish orqali, xalqimiz orasida oʻzlikni anglash va tarixiy ildizimizga oid bilimlarni oshirish maqsad qilingan.

Loyiha doirasida kun davomida viloyatning barcha hududlarida “Yangi Oʻzbekiston – islohotlar falsafasi” nomli anjuman, ilgʻor, faol yigit-qizlar ishtirokida “Zamonaviy yoshlar – taraqqiyot drayveri” mavzusida ilm-fan va innovatsiyalarga bagʻishlangan mahorat darslari, shuningdek, “Oʻzbekiston obidalaridagi bitiklar” kitob-albomi taqdimoti kabi tadbirlar oʻtkaziladi.