Imom Buxoriy xalqaro ilmiy-tadqiqot markazi bukhari.uz
Xabar berilganidek, joriy yilning 2-15-dekabr kunlari Oʻzbekistondagi Islom sivilizatsiyasi markazi, Respublika Maʼnaviyat va maʼrifat markazi, Oʻzbekiston mahallalari uyushmasi hamda qator tashkilotlar bilan hamkorlikda “Tamaddun, madaniyat va maʼrifat” mavzusida yurtimiz boʻylab “Maʼrifat karvoni” ilmiy-maʼrifiy va madaniy targʻibot tadbirlari oʻtkazilmoqda.
“Maʼrifat karvoni”da hududlardagi olimlar, ziyolilar, sanʼat va madaniyat namoyondalari, maʼnaviy-maʼrifiy ishlarga masʼullar, mahalla faollari hamda ilgʻor yoshlarning bu boradagi bilim va koʻnikmalarini oshirish, mamlakatimizning milliy-mafkura yoʻnalishidagi islohotlari, jamiyatni, ayniqsa, yoshlarni buzgʻunchi gʻoyalardan himoya qilishda ziyolilarni faollikka undash, ular uchun muloqot platformasini yaratishdan iborat. Aynan ziyolilarni mazkur ishga keng jalb qilish orqali, xalqimiz orasida oʻzlikni anglash va tarixiy ildizimizga oid bilimlarni oshirish maqsad qilingan.
Loyiha doirasida viloyatlar va Qoraqalpogʻiston Respublikasida 3-dekabrdan boshlab oʻtkazilayotgan tadbirlarda koʻplab ilmiy muassasalar vakillari bilan birga Imom Buxoriy xalqaro ilmiy-tadqiqot markazi xodimlari ham faol qatnashib, oʻz maʼruzalarida milliy va islomiy qadriyatlar, maʼrifat va taʼlimning ahamiyati, Imom Buxoriy va boshqa buyuk allomalarning ilmiy merosi haqida soʻz yuritmoqda.
Surxondaryo viloyati Imom Termiziy xalqaro ilmiy-tadqiqot markazida “Yangi Oʻzbekistonda diniy-maʼrifiy sohada amalga oshirilayotgan islohotlar va bunyodkorlik ishlari” mavzusida oʻtkazilgan ziyolilar forumida yurtimizda olib borilayotgan islohotlar, diniy sohaga boʻlgan eʼtibor, erishilgan yutuqlar haqida soʻz bordi.
Targʻibot tadbirlari Termiz iqtisodiyot va servis institutida “Yangi Oʻzbekiston – islohotlar falsafasi” nomli maʼnaviy-maʼrifiy anjuman hamda Termiz Davlat muhandislik va agrotexnologiyalar unversitetida “Zamonaviy yoshlar – taraqqiyot drayveri” mavzusidagi ilm-fan va innovatsiyalarga bagʻishlangan mahorat darslari va kitob taqdimoti bilan davom etdi.
Xuddi shunday tadbirlar respublikamizning Jizzax, Namangan viloyatlari va Qoraqalpogʻiston Respublikasida oʻtkazildi.
Bugun “Maʼrifat karvoni” tadbirlari Sirdaryo, Xorazm, Fargʻona viloyatlarida davom etadi.
