Imom Buxoriy xalqaro ilmiy-tadqiqot markazi bukhari.uz
Qutayba: “Agar Buxoriy sahobalar orasida boʻlganlarida, bir moʻjiza boʻlardi”, – deganlar.
Muhammad ibn Yusuf Hamadoniy aytganlar: “Biz Qutayba ibn Saʼidning huzurlarida edik. Abu Yaʼqub Shaʼroniy degan bir odam kelib, u kishidan Muhammad ibn Ismoil Buxoriy haqlarida soʻradi. Shunda Qutayba boshlarini egdilar. Keyin baland koʻtarib: “Ey eshitayotganlar, hadis va fiqh ilmlarini yaxshilab koʻzdan kechirdim. Zohidlar, obidlar, faqihlar bilan oʻtirdim. Biroq aqlimni taniganimdan buyon Muhammad ibn Ismoilga oʻxshashini koʻrmadim”, – dedilar”.
Hoshid ibn Ismoil aytganlar: “Qutaybaning: “Muhammad ibn Ismoilning zamondoshlari oldidagi sidq va taqvolari Umarning sahobalar oldidagi sidq va taqvolaridek edi”, – deganlarini eshitdim”.
Hoshid ibn Ismoil aytganlar: “Ahmad ibn Hanbalning: “Xurosondan Muhammad ibn Ismoildek (boshqa bir) kishi bizga kelmadi”, – deganlarini eshitdim”.
Abu Hotim Roziy aytganlar: “Muhammad ibn Ismoil Iroqqa kelgan olimlarning eng bilimdonidirlar”.
