Imom Buxoriy xalqaro ilmiy-tadqiqot markazi bukhari.uz
Muhammad ibn Abu Hotim aytganlar: “Imom Buxoriyning: “Amr ibn Ali Fallosning shogirdlari men bilan bir hadis ustida tortishdilar. Men: “Unaqa hadisni bilmayman”, – dedim. Ular: “Buxoriyning ham bilmaydigan hadislari bor ekan-da”, – deb xursand boʻlib, Amrning oldiga borib bu haqda xabar berganlarida, u kishi: “Muhammad ibn Ismoil bilmaydigan hadis hadis emas”, – debdilar”, – deganlarini eshitdim”.
Muhammad ibn Abu Hotim aytganlar: “Hoshid ibn Abdullohga Abu Musʼab Zuhriy aytganlar: “Bizning nazdimizda Ahmad ibn Hanbaldan koʻra Muhammad ibn Ismoil faqihroq va hadisda bilimdonroqdir”. Shunda u kishiga: “Haddan oshirib yubordingiz”, – deyildi. Abu Musʼab bu gapni aytgan kishiga qarab: “Agar sen imom Molikni koʻrganingda, uning va Buxoriyning yuzlariga qarab, ikkovlari fiqh va hadisda teng degan boʻlarding”, – deb javob berdilar”.
Muhammad ibn Abu Hotim aytganlar: “Hoshid ibn Ismoildan eshitdim. U kishi Isʼhoq ibn Rohavayhning: “Buxoriyning hadislarini yozinglar. Agar Hasan Basriy zamonlarida shu yigit boʻlganlarida ham, odamlar Buxoriyning hadis va fiqhiy ilmiga muhtoj boʻlishardi”, – deganlarini eshitganlar”.
