Imom Buxoriy xalqaro ilmiy-tadqiqot markazi bukhari.uz
Avval xabar berilganidek, Oʻzbekistondagi Islom sivilizatsiyasi markazi, Imom Buxoriy, Imom Moturidiy va Imom Termiziy xalqaro ilmiy-tadqiqot markazlari, Oʻzbekiston xalqaro islom akademiyasi vakillaridan iborat Oʻzbekiston delegatsiyasi Buyuk Britaniya safari doirasida turdosh tashkilotlarga tashrif buyurib, muhim uchrashuvlar oʻtkazmoqda.
Jumladan, joriy yilning 29 noyabr sanasida delegatsiya aʼzolari ishtirokida London shahrida joylashgan Islom madaniyati markazida davra suhbati tashkil etildi.
Uchrashuvda oʻtgan vaqt davomida ikki tomonlama hamkorlikning natijalari sarhisob qilindi. Jumladan, Londondagi islom madaniyati markazida Oʻzbekistonning boy ilmiy-madaniy merosi haqida oʻtkazilgan targʻibot uchrashuvi, markazlarning ilmiy nashrlari taqdimoti ijobiy natija berganligi qayd etib oʻtildi.
Markaz rahbari Ahmad Dubayan: “Imom Buxoriyning butun islom ummati uchun qilgan xizmatlari beqiyos. Shu sababli biz Oʻzbekistonni hurmat qilishimiz shart”, deya alohida taʼkidladi.
Davra suhbati davomida Britaniya tomoniga Yangi Oʻzbekistonda diniy-maʼrifiy sohada amalga oshirilayotgan keng koʻlamli islohotlar, diniy bagʻrikenglikni taʼminlash borasidagi milliy tajriba haqida batafsil maʼlumot berildi.
Islom madaniyati markazi tomonidan hamkorlikda Oʻzbekistonning qadimiy va boy tarixini aks ettiruvchi foto-koʻrgazma hamda ilmiy-tadqiqot markazlarining yangi nashrlarining taqdimotlarini tashkil etish taklifi bildirildi.
