Imom Buxoriy xalqaro ilmiy-tadqiqot markazi bukhari.uz
Imom Buxoriy xalqaro ilmiy-tadqiqot markazining bir guruh tadqiqotchilari – Otabek Muhammadiyev, Mehrojiddin Amonov, Abduvosi Shonazarov va Otabek Bahriyev Turkiyadagi Islom tafakkuri instituti tomonidan tashkil etilgan “Ikkinchi Movarounnahr yozgi seminarlari” nomli oʻquv-amaliy mashgʻulotlarida ishtirok etmoqda.
Seminar darslarida Oʻzbekiston xalqaro islom akademiyasi, Imom Moturidiy va Imom Termiziy xalqaro ilmiy-tadqiqot markazlari, shuningdek, Ahmad Yassaviy nomidagi Qozogʻiston-Turkiya xalqaro universiteti professor-oʻqituvchilari va ilmiy tadqiqotchilari ham qatnashmoqda. Oʻquv kursi olimlar oʻrtasida tajriba almashish, hamkorlik oʻrnatish va islom madaniyati targʻibotini yangi bosqichga koʻtarishni maqsad qilgan.
Ilmiy faoliyat sohasidagi xalqaro hamkorlik aloqalarini yanada kengaytirish maqsadida Markaz va Islom tafakkuri instituti oʻrtasida imzolangan Memorandumda ilmiy xodimlar uchun yozgi oʻquvlarni tashkil qilish ham nazarda tutilgan edi. Keyinchalik Markaz delegatsiyasining institutga tashrifi chogʻida malaka oshirish kurslarini joriy etish bilan bogʻliq tashkiliy ishlar muhokama qilindi.
Kuni kecha ushbu kursning ochilish marosimi boʻlib oʻtdi. Unda Institut rahbari, professor Mehmet Goʻrmez tabrik nutqi soʻzladi. Tadbirda Markaz direktori oʻrinbosari, tarix fanlari boʻyicha falsafa doktori Otabek Muhammadiyev ham soʻzga chiqib, samimiy qabul uchun tashkilotchilarga minnatdorlik bildirdi va oʻquvlar amaliy hamkorlikni jadallashtirishi, shuningdek, jamoalardagi ilmiy salohiyatni yanada oshirishga xizmat qilishini taʼkidladi.
Mashgʻulotlar davomida ishtirokchilar uchun islom ilmlari boʻyicha 30 nafardan ziyod taniqli olim maʼruza qilishi va mamlakatning Anqara, Bursa, Konya va Istanbul shaharlaridagi diqqatga sazovor joylarga sayohati rejalashtirilgan.
Malaka oshirish kursi bir oy davom etadi.
