Musulmon ulamolari xalqaro uyushmasi bilan hamkorlik yanada rivojlanadi

Shu yil 9-11 may kunlari Qatar davlati safari mobaynida Oʻzbekiston musulmonlari idorasi raisi oʻrinbosari Uygʻun domla Gʻafurov Musulmon ulamolari xalqaro uyushmasi Bosh kotibi Shayx Ali Muhyiddin Qoradogʻiy bilan uchrashdi.

Doha shahrida joylashgan bosh qarorgohdagi muloqotda Shayx Qoradogʻiy hazratlari Oʻzbekiston musulmon ummati uchun ahamiyatli ekani, bu yurt Islom ravnaqiga beqiyos hissa qoʻshgani, ayniqsa, Imom Buxoriy xizmatlarini barcha musulmon xalqlari yuksak eʼtirof etishini bildirdi.
Bosh kotib janoblari yurtimizdagi oʻzgarishlarni kuzatayotgani, xususan Prezidentimizning xalqaro minbarlardagi Islom dini maʼrifatini keng tarqatish borasidagi tashabbuslaridan mamnun ekanini izhor etdi.
Uchrashuvda Uygʻun domla Oʻzbekiston musulmonlari idorasi raisi, muftiy Nuriddin domla hazratlarining ezgu tilaklarini Shayx Qoradogʻiyga yetkazish barobarida diniy sohadagi ishlar haqida maʼlumot berdi.
Shuningdek, ikki tashkilot oʻrtasida memorandum imzolash, yurtimiz ulamolarini uyushmaga aʼzo qilish, diniy soha xodimlari uchun seminarlar tashkil qilish, ilmiy hayʼatlar tuzish va muhim mavzularda anjumanlar oʻtkazish kabi masalalar ham keng muhokama qilindi.

Maʼlumot oʻrnida, Musulmon ulamolari xalqaro uyushmasi 2004 yilda 50 nafar ulamo tomonidan tuzilgan. Bosh qarorgohi Qatar poytaxti Doha shahrida joylashgan. Tashkilot maqsadi – ulamolarning jamiyatdagi roli va mavqeini oshirish, ummat oldidagi muammolarni hal etish yuzasidan takliflar ishlab chiqishdan iborat.

Manba: muslim.uz