Imom Buxoriy xalqaro ilmiy-tadqiqot markazi bukhari.uz
Dr. Sayful ASRIY – Bulgʻor islom akademiyasi ilohiyot kafedrasi oʻqituvchisi (Rossiya)
Bismillahir rohmanir rohiym. Alloh taologa hamdu sanolar va Paygʻambarimiz Muhammad alayhissalomga salavot va salomlar boʻlsin!
Muborak va goʻzal Oʻzbekistonga ilk bor kelishim. Ziyoratim Toshkentdan boshlanib, Xorazmda davom etdi. Yurtingizning inson bahri dili yayraydigan koʻp ajoyib joylarida boʻldim.
Bugun Samarqanddaman. Imom Buxoriy xalqaro ilmiy-tadqiqot markazi mehmoni boʻlib turibman. Markaz xodimlarining Imom Buxoriy rahmatullohi alayhning ilmiy merosi, bugungi davrgacha yetib kelgan asarlari boʻyicha ilmiy izlanishlarini koʻrib, qalbim quvonchga toʻldi.
Shu oʻrinda davlatingiz rahbariga katta minnatdorlik va yuksak ehtiromimni izhor etmoqchiman. Tarixda buyuk ulamolari bilan ulugʻvor nom qozongan Oʻzbekiston zaminida bunday ilm markazlari tashkil etilib, islom maʼrifatini kengroq taratish, Imom Buxoriy, Imom Moturidiy, Qaffol Shoshiyning, asarlari bilan olamni ilmga toʻldirgan boshqa barcha olimu ulamolarning ilmiy merosini tadqiq qilish uchun ulkan imkoniyatlar yaratilayotgani tahsinga sazovordir.
Allohdan Markaz faoliyatiga rivoj va xodimlariga kuch-quvvat tilab, bu yerda qilinayotgan ilmiy amallar kelajak avlodga ajdodlarini anglash va ularning munosib davomchisi boʻlib yetishishi uchun xizmat qilishiga umid bildiraman.
Tas-ix:
